Ane sa ankò, nou gen randevou nan jedi 7 jenfèt Dye an pou gwo jounen «Livres en folie». Se pi gwo evènman sou liv an Ayiti. L’ap fèt nan «Parc de la Canne à sucre» kote ekriven pral kapab rankontre ak lektè yo, siyen liv pou yo ak pale ak yo.  Pri liv kap vann nan espas «Livres en folie» ap bese nan nivo 40%.

Avan nou antre nan Jounen «Livres en folie» a oganizatè yo ap konsakre 15 jou sou liv yo.  Soti 28 me pou rive 10 jen, ekriven etranje ak ekriven Ayisyen pwal anime yon seri deba ak atelye sou liv.

.

Se pou 18èm fwa ke «Livres en folie» ap fèt e chak ane yo rann yon ekriven omaj. Ane sa a, se powèt Georges Castera k’ap gen onè  a.  Max Chauvet, youn nan  oganizatè evènman sa a ki tap pale ak Lenouvelliste  di se youn nan pi bon chwa ki te ka fèt, ane sa yo  te vle rann pwezi a omaj, e lè ou di pwezi an Ayiti Georges Castera se premye moun ki ta dwe vinn nan tèt ou. E pou anpil espesyalis, Castera se pi gwo powèt ki ekri an kreyòl. Sou 36 liv powèt la, 10 ap disponib poul siyen pou moun ki achte yo. Anpil nan liv li yo pa sou mache a ankò, e te ekri nan yon kreyòl ansyen, sa ki ta mande yon pase men anvan yo ta  resòti yo, toujou dapre Max Chauvet.

Ane sa tankou chak ane, oganizatè yo promèt ke yap fè efò pou moun ki pral achte liv yo pa oblije kanpe anpil nan liy, an nou espere ke se pou tout bon.

YOD
twitter : @yodtipiti, @tipiti.biz

sou Georges Castera  :
http://www.lehman.cuny.edu/ile.en.ile/paroles/castera.html

.

« Tanbou kreyòl »

pwèm pou 4 podyòl ak de wòch

Tanbou mache di
sa-m pa ka pote
ma kapote-l
sa-m pa ka
sa-m pa ka
ma ka
trakatap katap ka
trakatap katap ka
GOUDOU GOUDOU GOUDOU
plop
plop
plop
Gen tanbou
se ak zo mò pou bat yo
pou bri a sèk rèk
Apre ou bat vant yo
pou fè yo pale
GOUDOU GOUDOU GOUDOU
plop
plop
plop
pou fè yo pale
pou nèg isit nèg lòtbò
sispann lage chèy pay
anba sab lanmè
trakatap katap ka
ma ka
sa-m pa ka
ma ka pote-l
san-m pa kapote-l
Tanbou-m bat la
Tanbou-m bat la
wa karese-l ak men ou
wa karese-l ak kò-w
Mo kreyòl yo se tanbou-m
Tanbou m’bat la rèk
Tanbou m’bat la sèk
Tanbou yo mache di
san timoun san granmoun
depi anro jouk anba
San timoun, san granmoun
tout lajè tout longè
tout lage lan lari aklè
Se yon lame fizi atè
ki pa veye frontyè
ki pa veye lanmè
se yon lame san lonè
yon lame pèyè
san peyi
k’ap gaspiye on divital
rafal katafal
catafales
pou fè moun pè
Se yon lame pèpè
lòt ame abiye dezabiye
a klè
Tanbou mache di
sa-m pa kapote
wa ka pote-l
wa kapote-l
si-m pa ka pote-l
sa-m pa ka
sa-m pa ka
wa ka
trakapap katap ka

Georges Castera