Detripay – BélO

[Refrain]
Kloutoup kloutap, miwo miba
Klopi klopan, nou tèt anba
N’ap tatonnen, je n nan fè nwa
N’ap monte mòn sou janm de bwa

[Verse 1]
Lanvè nan dwèt, douvan dèyè
Rèv depaman, twòkèt malè
Kazak ranyon, karako sal
Kòlèt debraye, jwèt bosal
Yon kout kleren nou an zigzag
Lavi yon pèp tounen yon blag
Vètij grenpe tèt Maryela
Poto san fil jwen madigra

Li anòmal, men li nòmal
Yon lamayòt nan kanaval
Yon kadejak, sou yon pope twal
Yon pi d’etwal nan plas zètwal

[Refrain]
Kloutoup kloutap, miwo miba
Klopi klopan, nou tèt anba
N’ap tatònen, je n nan fènwa
N’ap monte mòn sou janm-de-bwa

[Verse 2]
Ti fi douz an k’ap fè twotwa
Anfans yo make ak kout ba
Yon ti flè k’ pandye nan kochma
K’ap bouske lavi nan fatra
Timoun k’ap drive nan lari
Yon kò k’ poko menm fin grandi
K’ap vann plezi, pran maladi
Kase lè zo anba galri
Fò’n ta ekri sa nan listwa
Doulè k’ nan ren mache anba
Inosans vann nan bak lavil
Barèt, riban ou poupe fil

[Vamp]
Gade dezòd nan lakou a (Mezanmi l’pa nòmal)
Pwoblèm nan lakou a (Mezanmi l’pa nòmal)
Gade dezòd nan lakou a (Mezanmi l’pa nòmal)
Pwoblèm nan lakou m nan (Mezanmi l’pa nòmal)

Li pa nòmal (8x)
Men pwoblèm yo la
Pwoblèm yo mare pye nou…

Lyrics: Jean Winer PASCAL and Jean Belony MURAT (BélO)
Music: Jean Bélony MURAT (BélO)