TKSK: kuit manje ak bon pwopòsyon POU diminye bidjè manje ou

Ti Konsèy Sou Kuizin avèk chèf Jéach

Bidjè manje reprezante pou pipiti 20% bidjè yon fanmi. Kijan ou ka ekonomize lajan sou depans sa-a san yo pa manje mal pou otan?

Si ou se moun ki fè manje sou filing ou, koupe sa sèk! Se yon sous gaspiyaj epi menm manje a pa janm koute ou menm kòb la (chak fwa ou fè yon ti Free Style ki chanje bagay yo) Koumanse fè manje ak pwopòsyon. Sa trè enpòtan si souvan ou konn konstate swa ou pa fè ase, oswa ou konn fè twòp. Oubyen ou nan relijyon moun ki konn ap manje menm manje ya pandan twa jou, pase li te fè yon bon kantite… Kidonk, pou evite gaspiyaj epi jete manje, gen plizyè teknik. Li trè pratik sitou lè ou pa gen frizè!

1. Kwit dapre resèt espesifik

Si se pat nan abittid ou fè efò a. Avèk entènèt la, ou ka jwenn resèt ak pwopòsyon adapte a kantite moun ki sou tab la. Si nan yon premye tan, sa sanble restriksyon a kreyativite ou, oubyen sou libète ou, ou dwe byenvit konprann se yon mwayen efikas pou fè ekonomi.

2. Fè yon lis fè makèt

Sa va pèmèt ou gen yon minimòm òganizasyon, pou etabli meni pou semèn lan. Avantaj la se ke ou ka fè yon lis makèt vrèman presi. Le konsa, ou ka sèlman achte sa ou reyèlman bezwen. Pa plis ni mwens.

3. Kuit manje ak bon pwopòsyon

Konbyen espageti pou yon sèl moun? Konbyen diri? Epi sitou kijan pou mezire yo si ou pa gen yon balans lakay ou ? Sa yo se ti rechèch pèsonèl ou dwe fè epi jwenn teknik ak konbinezon pa ou pou toujou fè menm kantite a pou menm kantite moun nan.

Pou edew yon ti kras men yon ti gid
Kantite Manje pou chak moun (granmoun)

Salad 300 g kòm yon plat prensipal,
Salad 200 g si se kòm antre nan yon manje
Legim 175 a 225 g (si se akonpagnman)
Omelet, ze fri 2 ze
Pat 100 g (si se akonpagnman)
Pwason _(netwaye)_130 a 170 g
Pwason (san netwaye) 220 a 260 g
Vyann san zo 150 a 200 g
vyann moulen 125 a 150 g
diri 60g
Salad fwi 120 a 160

Pou moun ki pa gen yon balans lakay yo, swa envesti nan youn, oswa nan yon tas pou mezire (ki yon ti jan mwen presi ke balans la).

Bon mèkredi !

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto kouvèti: MICHAEL HESSION/WIRECUTTER (Le Monde)