TKSK: gen legim ou pa bezwen achte plizyè fwa

Ti Konsèy Sou Kuizin avèk chèf Jéach

Eske ou te konnen gen kèk legim ou te ka achte yo yon sèl fwa epi ou pa janm achte yo ankò? Pandan kèk mekredi mwen pwal montrew kouman ou ka fè pouse yon legim (oubyen yon fwi) pou pa oblije achtel epi toujoul genyenl fre

Paske legim yo vin pi chè, paske nou ta renmen gen legim fre ki pa janbe dlo pou vin jwenn nou, li enpòtan pou nou aprann plante pwòp legim nou. Li pa twò konplike e byen souvan ou pa menm bezwen yon jaden.

Kawòt, salad, anana… eske ou te konnen ou ka fè yo pouse nan salon ou? Pou fè sa wap kòmanse pa achte yo. Ou manje yo kòm dabitid epi yon pati nan yo ou plante yo. Anplis de sa, ou pa menm bezwen fò nan fè jaden. Legim sa yo mande jis yon ti atansyon. Yo grandi poukont yo, san yo pa bezwenw plante grenn. Ou jis bezwen swiv kèk etap epi respekte sèten règ ke mwen pwal bawou la.

1._ Fè pouse anana
Ou renmen anana? Ou abitye kale li, koupe fèy yo epi jete yo? Ebyen pa kontinye fè sa, se jisteman pati sa a, ak fèy yo, ki dwe ak anpil atansyon konsève pou fèl pou se epi gen anpil lòt anana.

Olye pou yo jete pati ki gen fèy yo nan fatra, plante li epi li pral ba ou yon nouvo plant. Pou li pouse byen, chwazi yon anana ki pa twò mi. Nan fason sa a, fèy yo trè vèt, nan bon fòm, epi yo pa sèk ditou. Si fèy yo sèk epi yo deja jòn, gen anpil chans pou ou pa rive fè anana pouse. Se konsa, si ou pito anana trè juicy ak dous, koupe fèy yo lè li toujou wòwòt, vlopel nan fim plastik epi kenbel nan frijidè a jiskaske li rive a matirite.

Yon anana kap grandi nan yon po

Pou fè sa, koupe tèt fwi a epi mete pati koupe a nan dlo. Anana ou bezwen anpil limyè pousa metel toupre yon fenèt kote li ka wè solèy tout tan. Pa enkyete w si ou jwenn fèy yo koumanse vin jòn. Sa nòmal. Si ou obsève byen, ou pral wè nouvo ti fèy vèt parèt nan mitan fèy jòn yo. Prèv ke anana ou a byen vivan! Piti piti, ti fèy sa yo pral pran plas lòt fèy yo. Apre apeprè yon mwa, jèn rasin yo ap kòmanse parèt. Kounye a se moman pou plante anana ou nan yon po. Men, anvan, pa bliye retire fèy pouri yo. Paske yo initil. Yo soti trè fasil. Si ou kite yo, plant ou a ka menm pouri.

Tout sa ou dwe fè se tann pou anana ou a grandi nan pwòp vitès li. Lè li grandi, mete l nan yon po pi gwo. Ou pral wè, li trè bèl epi li trè bon!

Bon mèkredi !

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto kouvèti: econo-ecolo