TKSK: Èske ou ka itilize luil pou fri plizyè fwa san danje pou sante ou?

Ti Konsèy Sou Kuizin avèk chèf Jéach

Mwen konnen yon moun ki chak fwa li fri manje li jete lwil la. Machann fritay la ki anfàs la pa jete lwil fritay la chak jou non. Alòs konsey jodi ya se Èske w ka itilize lwil pou fri plizyè fwa san danje pou sante w?
Gen kèk moun ki kwè ke li posib pou fè sa san pwoblèm pou lasante, pandan ke lòt moun di non se danje. An verite ou ka absoliman fri manje nan lwil ki fri deja, men nan sèten kondisyon … Se sa mwen pwal detaye avèk nou la.

1. Èske yo ta dwe chanje lwil ou fin fri apre chak itilizasyon?
   Pa gen okenn nesesite pou chanje lwil ou fi n fri apre chak itilizasyon. Pwofesyonèl restorasyon endike, pa egzanp, ke yon bon lwil ka itilize 5 fwa anvan yo ta chanje. UFC (Union Federal Konsomatè) menm endike ke lwil la ka itilize dis fwa! Li donk klè ke ou pa bezwen kontinye fè sa si sa te nan abitid ou. Lwil la ka itilize plizyè fwa san okenn pwoblèm. Epi sa se yon bon nouvèl pou bous ou nan yon tan kote tout bagay pwal vin pi chè.
   
2. Kouman pou mwen konnen si mwen bezwen chanje lwil mwen an?
   Menm si lwil la ka itilize plizyè fwa, li toujou nesesè pou rete vijilan sou aspè li ak teksti li. Paske kèk siy pap twonpew. Se yo menm ki detèmine lè li pa bon ankò ak ki lè li absoliman bezwen chanje. Fè anpil atansyon sou siy sa yo, paske lwil ki fri deja gen yon sibstans danjere. Mwen ap pale, pa egzanp, nan lwil ki fri deja, ki gen yon koulè trè mawon e ki trè glise. Oswa yon lwil ki gen move sant epi ki bay anpil lafimen lèl cho. Si ou wè janr de bagay sa yo parèt, li lè pou chanje li. Ou dwe konnen ke gen tou tèstè lwil fri. Se vre, li byen chè, men li ka evitew jete lwil la avan lè pandan ke li la toujou bon.
   
3. Ki risk pou sante lèw itilize lwil ki fri deja?
   Lwil ki fri deja ka trè toksik pou sante nou. Paske kòm li itilize deja, lwil la pèdi bon jan kalite li yo. Premye konsekans, li bay manje fri ya move gou. Sa pa gen enpak imedya sou sante nou. Kote bagay la vin difisil la, se lè lwil la gen yon kantite plis pase 25% nan konpoze polè. Kisasayesa? Pou mete li tou senp, ou ta dwe konnen ke plis ou itilize yon lwil ki fri deja, plis li chaje ak sibstans danjere plis ou sèvi avèl plis pousantaj matyè sa yo ap ogmante se pousa oganizasyon siveye bòn sante yo limite pousantaj sa a 25%. Piwo ke sa gen gwo risk pwouve pou sante. Map pale de endijesyon oswa dyare. Lè pousantaj la ap vale teren sibstans sa yo potansyèlman kanserojèn! Ou pa gen kansè touswit, men nan mwayen ak long tèm, li ogmante risk yo …
   
4. Ki jan yo kenbe lwil ki deja fri osi lontan ke posib?
   Gen yon règ an lò pou kenbe lwil fri osi lontan ke posib. Li nesesè pou sèvi ak yon lwil ki gen yon gwo rezistans ak chalè. Nan sans sa a, mwen pral imedyatman touye yon mit sou lwil doliv. Li trè bon pou sante se vre; men pa toujou apwopriye pou fri. Lè li vin twò cho, li degaje sibstans toksik. Pou fè fritu ou, achte lwil “espesyal pou fri”. Yo lajman itilize ankò epi yo pi byen kenbe tèt ak tanperati ki wo, se lwil pistach parekzanp. Yon lòt bagay pou kenbe lwil ou pi lontan: pa chofe li nan yon tanperati ki twò wo. Pa plis pase 190 ° de tout fason. Sinon, ou riske fè li toksik trè trè vit. Nan lòt sans la tou, pa chofe li anba 160 °, otreman manje a pral pran plis tan pou chofe. Kòm rezilta, yo tranpe nan lwil ki fri deja epi yo vin trè trè gra. Fè atansyon tou pou pa boure lwil ou ak dlo. Li fè li bave epi li akselere degradasyon li yo. Si w ap fè fritu, pa egzanp, absòbe imidite a byen ak papye oswa yon sèvyèt avan ou lagel nan grès cho a. Finalman, sonje netwaye ak paswa lwil ou apre chak itilizasyon. Pou sa, pa gen anyen ki trè konplike, sèvi ak yon paswa fen, yon « filtre » kafe oswa sèvyèt papye. Finalman, yon fwa netwaye ak filtre, nou evite kite lwil la nan friteuz la. Nan nenpòt ka, li pa ka depase plis pase 3 semèn san yo pa itilize (Fòk li byen kouvri byen sere). Pi bon fason pou konsève li se kenbe l nan yon boutèy plastik (sa yo te vann li ya pa egzanp). Mete boutèy la nan frijidè a jiskaske pwochen itilizasyon.
   
5. Ki kote pou jete lwil fri?
   Oke, menm si kounye a ou konnen ke lwil fri yo ka reyitilize, malerezman li pa dire pou tout tan. Lè li rive yon moman, li dwe ranplase epi ansyen an ou dwe jetel. Èske w konnen ki jan pou fè sa? Anvan m di w kouman, mwen raple w ke li entèdi pou w jete ansyen lwil ou nan twalèt la oswa nan lavabo! Li ka tou bouche tiyo yo. Non, sa ou dwe fè se vide l nan yon veso epi pote l tounen nan sant resiklaj la. Si sa pa posib epi kòm yon dènye rekou, jete li ak fatra ki pa resikle.

Bon mèkredi !

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou