TKSK: Kijan pou fè yogout lakay.

Ti Konsèy Sou Kuizin avèk chèf Jéach

(Vandredi teknik) Konsèy teknik mwen pote pou nou se « Kijan pou fè Yogout Lakay? ». Ou renmen yogout, pa gen yon fwa ou ale nan makèt ou pa pran yon ti pak? E byen ou ka fè anpil kolomi si ou gen pasyans fèl lakay.

Lè ou fèl lakay li gen pi bon gou epi ou konnen egzakteman sa ki ladan l. Men, pou fè sa pa gen okenn nesesite pou nan achte yon « yogout Maker ». Wap beswen yon bokal an vè ak yon mamit a presyon (Sa nou rele presto a). Le konsa, ou ka fè pwòp yogout paw.

Engredyan wap bezwen

• yon yogout natirèl (pou pwodwi fèmantasyon li genyen andedanl)
• yon lit lèt semi-ekreme
• yon po yogout plen ak lèt an poud

Kijan fè sa ?

1. Bouyi lit lèt la.
2. Tann pou li refwadi a 45 ° C.
3. Lè sa a, vide lèt an poud ak yogout natirèl nan yon veso.
4. Melanje yo byen melanje.
5. Vide preparasyon an nan bokal an vè ya.
6. Ranpli presto a ak de vè dlo.
7. Chofe dlo a jouk li vin tièd.
8. Ranje po yogout yo nan presto a.
9. Fèmen kouvèti presto a.
10. Kite yogout yo poze pou omwen senk èdtan. (Li pi bon pou kite yo bò kote yon sous chalè.)
11. Apre senk èdtan, mete yo nan frijidè a jouk nan denmen maten.
    Epi se tout

Yon ti degi
Kounye a ou konnen resèt senp pou yogout natirèl lakay. Kounye ya ou ka « free style » nan varye plezi yo! Moso pèch oswa frèz an ete, moso “poire” oswa bannann nan sezon fredi, ekstrè roz oswa vyolèt, ou ka imajine tout bagay ak yogout sa yo! Saw panse siw ta fè yon resèt ak chokola?

Randevou kase pou vandredi pwochen pou dòt teknik nan zafè fè manje.

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto kouvèti: cindfourchettes.com