TKSK: Kisa (Kijan) yon spòtif wo nivo manje?

Ti Konsèy Sou Kuizin avèk chèf Jéach

Jodi ya map fè yon bagay mwen gen lontan mwen pa fè. Map reponn yon kesyon yon pasyone fidèl ki pa dakò pa jwenn repons, ni pran nan foulay… Yon esportif de haut niveau… kisa li manje ?

Nenpòt atlèt, menm okazyonèl oswa yon espòtman dlo sikre_(sportif du dimanche), dwe respekte prensip prensipal yo nan manje. Se poutèt sa sam pwal di la yo aplike pou tout moun depiw gen moyen.

Yon rejim alimantè, pou li ekilibre, dwe nan kantite ki ase pou baw kantite enèji ke ou bezwen pou fòs ou ap depanse nan espò wap pratike ya. Fòk manje ya pi divèsifye ke posib. Se sa ki pral garanti yon bon distribisyon nan pwoteyin, lipid, idrat kabòn ak yon bon rezèv konplemantè nan vitamin, mineral ak fib. Lè ou se yon atlèt wo nivo anjeneral ou genyen yon espesyalis ke yo rele yon Dyetetisyen ki ap swiv ou se li ki pwal kontwole kantite pwodwi ke mwen sòt site la yo nan meni Chèf Kwizin pèsonèl ou a ap baw. Sa vle di pou yon atlèt pwofesyonèl ki respekte tèt li manje ya gen yonn a de etap anplis ke jan yon moun nòmal manje. Li gen yon evalyasyon etaw aktyèl ou dabò, yo kalkile diferans ki eksiste ant janw ye ya e janw dwe ye (li ka poko nivo oubyen li twòp) epi dyetetisyen yan fè yon bilan plis yon rekòmandasyon. Chèf kwizin lan pwal kwit ak presizyon sa ki rantre nan rekòmandasyon an.

(An pasan gen plizyè espòtif wo nivo ki tèlman pran gou nan zafè manje sou kontwòl saa ke yo vin chèf kwizin nan fen karyè yo https://www.finedininglovers.fr/article/du-sport-aux-etoiles-michelin)

Menm si ou pa yon atlèt wo nivo, ou bezwen antrene regilyèman pou rete nan fòm. Menm si ou pa fè konpetisyon nan espò, lè ou patisipe nan aktivite fizik ak zanmi, rejim alimantè ou ede kenbe fòm. Ou se yon gason laj ap moute men ou ta renmen kapab kontinye bay rezilta lè sa sa nesesè ? Rejim alimantèw se pi gwo alyew !

Ekilib la se varyete. Atlèt la ka goute tout bagay, nan modération. Atlèt wo nivo tankou mwen dil deja a pral souvan swiv preskripsyon yon doktè espesyalis oswa yon nitrisyonis, ki moun ki pral akonpaye rejim alimantè li yo nan lòd pou yo optimize pèfòmans li.

Pwensip toujou senp yo sonje

1. Bay yon atansyon patikilye nan evite manje ki ki gen grès ak ki gen sik.
2. Manje omwen 5 fwi ak legim pa jou.
3. Dejene ta dwe yon repa korèk.
4. Ti goute gen plas li tou nan jounen yan.
5. Li nesesè pou manje sereyal (pen, pat, diri, elatriye), pòmdetè oswa grenn nan chak repa, favorize grenn antye.
6. Chak repa dwe genyen yon rasyon lèt, pwodui letye oswa fwomaj
7. Vyann, pwason oswa ze ta dwe enkli omwen yon fwa pa jou, bay preferans nan pwason osi souvan ke posib.
8. Menm si ou fè egzèsis pou pèdi pwa, pa bliye enpòtans ki genyen nan limite kantite grès ak favorize legim.
9. Pwodwi dous (sirèt, patisri, ba chokola) yo konsome yo nan kantite rezonab. Pa kont ou ka sèvi avè yo nan moman wap fè plis efò pou pote enèji bay kò a.
10. Si ou konsome bwason ki gen alkòl, nan konsomasyon chak jou ou pa ta dwe depase de 10cl vè diven, oswa de 25cl byè, oswa 6cl nan alkòl fò.
11. Anvan, pandan ak apre efò a, pa bliye idrat tèt ou, bwè dlo nan volonte anvan ou swaf dlo.

Mwen konnen gen moun ki ka sezi tande saa men yon nèg ki ap pouse bourèt sou lasalin lan respekte tout règ sa yo angwo : Yon ji lam nan maten ak yon bèl bout kann, yon 21 nanchon a midi menm lè li pata pran anyen nan aswè li deja gen ase enèji pou kantite efò li gen pou fè ya …

Bon mèkredi !

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou