TKSK: resèt sekrè pire pòmdetè ya.

Ti Konsèy Sou Kuizin avèk chèf Jéach

Moun ki abitye avèm, mou ki fidèl ak konsèy mwen yo konnen mwen pa twò fanatik bay resèt. Fè manje menm jan ak pale dwe yon espresyon pèsonèl yon kote wap kite pèsonalitew ak kreyativitew eksprime yo. Men sa rive yon nèg bat yon pwezi pou al resite pou moun ki fè kè li bat la alòs mwen konprann ou moun ka renmen konnen yon resèt poul al byen pase. Se poutèt saa lè pasyone ya dim li ta renmen konnen sekrèt pire pòmdetè mwen yan mwen pat ezite yon sekonn pou bay li…

Men resèt sekrè pire pòmdetè ya.

Ki sa ki pi bon pase yon ti pire pòmdetè ak yon ti steak? Pa anpil, nou dakò! An touka men resèt la pou ka al depoze nan fè bon jan pire pòmdetè.

Engredyan wap bezwen

• 1 kg pòmdetè
• 240 g krèm frèch
• 180 ml lèt
• 115 g bè
• sèl, pwav
• 3 dan lay

Ki jan pou fèl ?

1. Nan yon bonm, vide moso pòmdetè kale yo, kouvri yo ak omwen 3 cm dlo.
2. Bouyi yo jiskaske yo mouj (20-30 min depann sou gwosè pòmdetè yo). Yon kouto fèt pou antre fasil nan pòmdetè yo lè yo kwit.
3. Melanje bè ya, lay ak lèt la nan yon ti marmit. Chofe yo sou ti dife. Epi apre kite yo poze.
4. Seche pòmdetè yo nan yon paswa epi moulen yo (oubyen kraze yo) pandan yo toujou cho.
5. Ajoute bè ya, lèt ak lay epi melanje tout ansanm.
6. Fin bwase pòmdetè ya ak yon fouchèt jiskaske li vin lis.
7. Brase krèm frèch lan pòmdetè ya epi sizonnen li nan gouw ak sèl ak pwav. Kouvril jiskaskew pare pou manje.

Ale eseyel epi wa banm nouvèl …

Bon mèkredi !

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou