TKSK: ki sa ki yon «verrine», epi kijan pou amize ou nan fè li pou resevwa envite?

Ti Konsèy Sou Kuizin avèk chèf Jéach

(Vandredi teknik) Jodi ya nap fè yon ti rale sou VERRINE mwen si ou tande pale de sa deja. Si toutfwa sa patako rive nan konsèy jodi ya nou ap dekouvri«ki sa ki yon verrine, epi kijan pou amizew nan fè li pou resevwa envitew?».

Yon verrine se yon veso an vè. Pa ekstansyon nan domèn kwizin, yon verrine se yon plat ki sèvi nan yon ti vè ke yo manje ak yon ti kiyè. Verrine ou ka sèvi sa kòm antre (sitou siw vle parèt resan), se yon ti bat bouch leje, souvan ou ka pranl an kolasyon, pafwa ou ka fèl fè desè.

Lè wap fè « verrine » ou dwe pran plezi melanje teksti ak gou. Bon verrine lan bezwen krèm, likid, kroustiyan, ak ti bagay fre. Epi pouki pa ti gou dous, men tou asid, yon ti touch sèl (ka fè gou yo pi resoti) ak pètèt si ou vle yon ti kras anmè (bitter) pou yon ti touch final.

Pa bliye reflechi sou ki lè ou pral jwi verrine ou. Ou pa vle yon bagay ki twò likid alè, paske li pral kouri koule toupatou. Se menm jan an, ou pa vle anyen twò solid nan baz la, pase dènye kiyè yo ap mwen enteresan nan ka saa.

Metòd
Kòmanse ak yon eleman krèm ak onktueux nan pati anba a nan verrine la. Pa egzanp: krèm, mous, krèm chantiyi, elatriye.
Ajoute yon bagay ki pi likid. Pa egzanp: konpot, jele, koulis, sòs, konfiti, elatriye.
Apre sa a, kwense likid sa a ak lòt eleman krèm (menm saw te mete nan fon an oswa lòt) sou tèt pati likid la.
Fini ak yon kouch kroustiyan, pou ajoute kèk teksti. Eleman kroustiyan an kapab yon ti konfleks, yon patisri, yon tuile, yon mereng sèk, elatriye. Pa mete eleman kroustiyan an nan mitan verrine la paske li pral absòbe imidite ak pèdi teksti ou vle ya.
Lè w ap sèvi, ajoute pwen final la: yon eleman dekoratif delika oswa yon touche frechè tankou yon fwi, ti fèy te, flè, chokola, elatriye.

Mwen sipoze ke tout moun konprann ke lèw fin respekte baz saa rès la se nan menw li ye sèl imajinasyon ka limitew

Randevou kase pou vandredi pwochen pou dòt teknik nan zafè fè manje.

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto kouvèti: journaldesfemmes.fr