TKSK: Chalè pou transfòme manje

Ti Konsèy Sou Kuizin avèk chèf Jéach

(Vandredi teknik)

Jodi ya, n’ap fini ak gwo rale sou teknik kilinè nou te koumanse vandredi pase a. An fè yon ti rapèl sou Ki sa teknik gastronomik yo ye:

Nou te di ke_nou rele teknik gastronomik pwosesis ke nou aplike nan manje, nan objektif pou fè manje ya dijèstibl, manjab, gen bon gou ak kabab konsève plis tan._ E gras a teknik sa yo li posib pou elimine mikwòb, adousi engredyan yo pou fasilite moulen yo ak fè bon dijesyon, amelyore oswa diminye gou yo oswa odè yo, ba yo yon lòt aspè ki pi apetisan…

Nou te di tou ke malgre ke gen diferan klasifikasyon, gen yon konsansis pou divize teknik yo an de gwo gwoup:
• Teknik ki pa gen aplikasyon chalè
• Teknik ak aplikasyon chalè

Nan Teknik gastronomik san aplikasyon chalè nou te deja fè yon rale sou :
• Kwit nan asid
• Konsomasyon brit / Manje kri friz
• Marine ak sale
Kounye ya li rive tan pou mwen pale sou :
sòs frèt
Se yon teknik ki anjeneral fèt ak pwodwi kri, se sa yo rele yon sòs « émulsionnées » (yon « emulsion »). Pa egzanp, mayonèz _(ki estab : si ou kitel poze li pa tounen sal te ye anvan ni li pap separe) ak « vinaigrette » ki (enstab : depiw kitel poze li ap dekante chak konposan ki fèl yo ap fann yon bò).

Men kèk teknik ki yo menm sèvi ak chalè pou transfòme manje
Teknik gastronomik ak aplikasyon chalè ki sèvi ak diferan pwosesis pou kwit manje.

Kwit manje nan yon anviwonnman sèk (« Cuisson à l’air chaud »)
Nan ka sa a manje a sibi aksyon chalè sèk. Nan kategori saa ou ka pale de boukannen, kwit nan fou, griye, fimen, gratine oswa glase.

Kwit manje ak chalè men nan yon anviwonman mouye
Teknik saa kwit manje ya nan yon anviwonman mouye cho ki tranfere chalè li ya bay manje ya poul kwit li. Nan kategori saa ou jwenn kwit alavapè, « bain-marie » ak kwit « sous vide ».

Kwit manje nan yon likid
Gwoup sa a gen ladan tout teknik kote manje yo benyen nan yon likid cho: bouyi, poche ak kwit manje a presyon.

Kwit manje nan grès
Yo enkli nan kategori sa a teknik ki sèvi ak lwil, bè, grès kochon, elatriye. pou kwit manje nan tanperati ki cho anpil tankou sote nan grès, fri elatriye.

Kwit nan yon konbinezon plizyè mwayen
Manje kreyòl fè sa anpil. Nou sèvi ak plizyè teknik konbine pou fè manje (nou chode, nou kite domi nan sizonad, apre nou fri …) Nan kategori teknik konbine pou kwit nou ka site: Pòmdetè fri adoub kwison, konpòte, swe, braize, fri epi apre bouyi nan sòs eksetera.

Randevou kase pou vandredi pwochen dòt koze sou teknik fè manje. pa anreta sèlman

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto : chefsimon.co