Ti Konsèy Sou Kuizin avèk chèf Jéach
Nan seri aprann fè foto manje jodi ya nap kontinye sa nou ap fè depi kèk madi ki sot pase la yo. Eksplore estil photo kilinè tankou « STYLE MINIMALISTE » teknik ak konsèy pou aplike, pou fotow gen estil ak pèsonalite, san ou pa itilize yon pakèt akseswa epi depanse anpil.
Jodi ya epi men jan ak lòt madi ki pase yo mwen ap kontinye pale sou kijan pou fè foto krèm (pou seri ya pa twò long map menm baw 2 pou youn). Fè foto krèm sanble yon bagay senp. Men paske li senp, pase krèm fonn vit, pou evite toujou fè menm foto yo li enpòtan pou aprann kèk teknik avan…
40 – FÈ FOTO KRÈM KONSEY 04 ak 05
4- Fòme bèl boul (fèm epi byen won)
Eseye fòme bèl boul tankou li toujou ye nan foto ki kay machann krèm yo (menm si de fwa nan foto sa yo se pa krèm vre. Men sa se yon lòt deba). Retire krèm glase ou a yon ti kras davans. Si li twò di, krèm la pwal kraze lè w ap fòme boul la (petèt menm enposib pou fòme boul!). Krèm glase a ta dwe gen yon teksti lis. Tranpe louch pou fè boul la nan dlo cho anvan ou fòme yon boul avèl.
Men, si ou reyèlman pa ka fè bèl boul (swa pase ou pa maton oubyen pase ou pa gen zouti), ou ka sèvi ak yon kiyè pou bay krèm la yon fòm kibi (oubyen fòm yon gwo akra) yo se yon bon altènatif depi yo plizyè, parèy epi pap fonn ou nan batay.
5- Ajoute ti sesisela sou krèm nan (toppings)
Zanmann, Pistach, kraze chokola, biskwit kraze, fwi, koulis… *se otan ti sesisela ou ka simen sou tèt krèm nan pou bal pèsonalite. Ou ka rann krèm lan pi apetisan lè w ajoute topping (ki ka tou fè eko ak gou krèm glase a).
Si wap mete krèm nan nan kònè, ou ka rann konè pi chèlbè yo lè w bwose tèt la ak chokola fonn epi dekore ak pèl sik oswa vèmisèl kraze.
Pase yon bon madi, randevou kase pou lòt semenn pou plis toujou.
Jéach 2022
Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou
Foto : laphotoculinaire.com
Les commentaires sont fermés.