TKSK: “ŒUFS POCHES” ak “CROUTON A L’AIL”

Ti Konsèy Sou Kuizin avèk chèf Jéach

Jedi Tansyon

Nou pwal bay resèt sou you lòt nan petidejene mwen te rekòmande nan *21 jou menu tansyon san presyon* Nan *manje maten* jodi ya, ki dwe mete yon fen nan grangou omwen 12 zèd tan san manje ki ta dwe nomal si nou pase nwit la ap domi …

*Manje tansyon pou jodi ya se ŒUFS POCHES ak CROUTON A L’AIL*

PÒSYON: pou 4 mouns _(oubyen 4 repa pou yon moun)_

PREPARASYON: 20 minit

TAN POUL KWIT : 20 minit

*ENGREDYAN*

• 1.5 lit (6 tas) dlo

• 1 kiyè vinèg

• 8 ze

• 1 ti zong sèl

• Pwav

Pou krouton lay la _(si ou pa achtel tou fèt)_

• ½ bagèt koupe an 8

• 1 gwo kiyè _(c à soupe)_ lwil doliv.

• 1 gous lay koupe an 2

*PREPARASYON*

Chofe fou a a 180 degre C _(350 degre F)_. Nan yon gwo kaswòl, fè dlo a ak vinèg nan bouyi lejèman. _(Dlo a ta dwe koumanse fè ti boul san bouyi)_

Krake 4 ze youn pa youn nan dlo a. Sèvi ak yon kiyè pou pote blan yo alantou jòn yo. Kwit pou 4 minit Retire ze yo ak yon gwo kiyè epi mete yo sou papye absòban. Repete operasyon an ak ze ki rete yo.

Pandan se tan, sou yon papye kètrayt, bwose moso bagèt yo ak yon ti lwil epi griye yo nan fou a pou 5 a 6 minit.

Fwote lay la sou mwatye krouton yo.

Sou plat ou pwal sèvi petidejene ya, depoze krouton yo epi mete ze yo dousman. Gani ak pèsi, sèl ak pwav.

Akonpayman: pou yon manje maten konplè, sèvi ak 140 g (1 tas) ti fwi sezon _(bleyè, frèz, franbwaz)_

*ENFÒMASYON SANTE*

Lay gen bon rezilta sou tansyon. Tout moun ki fè tansyon konn sa pase ou jwenn li nan tout rejim pou bese tansyon. Anplis li pèmèt ou bay manje bon gout epi ak lay ou ka mete mwens sèl.

*VALÈ NITRISYONÈL POU CHAK PÒSYON*

• Kalori 370

• Lipid 15 g

• Sodyòm 550 mg

• Glisid 37 g

• Fib 2 g

• Pwoteyin 20 g

Bon Jedi ! @ Demen pou vandredi teknik

Jéach 2022

Ti Konsèy Sou Kuizin se yon ribrik ki anime pa Jéach (G.H.) Sou gwoup Whatsapp Rezo Passions ki rele Passion Gastronomie. Sou gwoup Whatsapp la, ribrik la pibliye sou non YonTiKonsèyChakJou

Foto : chefcuisto.com.com