SIMEON

Jodi a m’ap pataje ak nou Kanaval 1983 Dixie Band nan.
Se te premye fwa djaz la ta pral prezante l nan kanaval.
Djaz la pat gen lontan non plis. Li te fòme nan lane anvan-an avèk, kòm baz, kèk ansyen mizisyen Les Frères Déjean. Alatèt yo te genyen Ulrick (Tuco) Bouzi, el Unico!

Kanaval Simeon an pral yon gwo siksè. Petèt menm revelasyon ane 83 a.
Se yon kanaval pike devan. Ritmik la cho anpil e preske pa janm kanpe.
Ra fwa li fè yon ti kanpe yo, se pou rederape pi rèd.
Sou ritmik cho sa a, mesye yo depoze yon latriye bèl melodi.

Menm si se chita ou chita ap koute kanaval la. ke se melodi ki fèt ak liy van an, ke se sa kè a chante, ke se sa ki fèt ak nòt kibòd epi gimik vwa, tout anvi bwote ou ale, fè ou louvri de bra ou.
Gen 2 ladan ki patikilyèman dous anpil:

« Simeoooooon
rale chapo li
pou mete sou tèt medam yooooo,
Pou l’ ka voleeeeee,
Medam yooooooo
Pa okipe liiiii
Etranje pa genyen bon bann,
Bann lakay pi boooon »

« Woooo Dixiiiiiie…
Do-ré-miiiiii-ré-do-si-la-sol
Melodi aaaaa
La la la la la la la laaaaaaa »

Anplis, refren yo fasil. Fraz yo pa long, sa ki pèmèt ou kenbe yo vit.
Kè a travay pou ba ou lenpresyon tout yon foul ki ap chante.
Epi lè ou soti nan pati melodik yo, ou rantre nan yon frap beton move move!
Lè ou ap tande kanaval Simeon an, li difisil pou ou pa anvi retwouve w sou beton an pou w pwofite de anbyans la.

Pou tèks la li menm, se listwa yon diaspora (Simeon) ki deside rantre vin nan kanaval Ayiti, paske yo di l’ kanaval Ayiti se la pou w la. Byen vit nou rive konprann ke istwa a se yon pretèks pou simen kèk bon pawòl degize nan kanaval la, jan nou sot wè li nan pawòl ki sou melodi a.

Fòkn ou raple tou ke pèfòmans Fanfan (FRantz Gauthier) nan tèt fen kanaval la te gen anpil siksè. Apre sa, yo kareman konvèti fen kanaval la an yon mizik poukont li.

Kanaval Simeon sa-a pral kite tras nan kanaval kèk lòt djaz. Dixie donk, te fè « école» jiskaske kèk djaz pral kareman kpye dènye kanaval li a, Ozana. Nou ka tande yon dokimantè sou kanaval Ozana a nan adres sa a: https://tipiti.biz/site/2020/01/06/ozana-dixie-band/

Anatandan, m’ap swete nou pran plezi nou nan koute (danse tou) Siméon, Kanaval 1983 Dixie Band nan.